黃日華女兒黃芷晴、秦沛女兒姜麗文、王晶女兒王子涵、陳明恩及梁善喬等，今日喺銅鑼灣出席日本時裝少女品牌活動，透視谷胸嘅芷晴同露腰嘅子涵鬥性感，芷晴表示服裝已比父母過目。

芷晴噚日同爸爸黃日華一齊去政總撐港視，佢話今日有工作唔會去，問佢覺唔覺得港視發唔到牌，反而帶挈佢多人關注咗，工作又多咗？芷晴話：「關注係多咗，開心係客戶揀我哋，等我哋多啲曝光，雖然作品未能夠比大家見到，但我都見上網排行榜有自己個名，都係出道以嚟第一次，希望自己作品快啲出街。」芷晴又話最近工作係多咗，非常開心。

問佢係咪寧願港視有牌多過自己多工作，芷晴笑話：「最好有牌又多嘢做啦。」講到佢第一份工咁樣，芷晴話都有少少挫折，但又唔會因為咁而退出，因為好多嘢未試過。

同係港視藝人嘅姜麗文，話之前都有去過政總支持，但今日有工作唔得閒，不過自己當然非常支持。

佢話呢排工作係多咗，但最緊要係帶到訊息出嚟，希望政府睇到佢哋嘅夢想，姜麗文話：「佢哋決定唔發牌，唔係港視輸，係香港人輸咗，我哋冇咗freedomofchoice，係好慘一件事。」佢又話收入冇影響，王生都好錫佢哋，每月仲有出糧。

講到有報道話鄭俊弘唔認同佢拍拖，激嬲佢阿爸秦沛，佢話同阿爸都得啖笑，阿爸嘅反應係痴線，姜麗文話阿爸同Fred識得仲耐過佢同Fred，佢哋兩個仲close啲添。