長洲太平清醮，本來有搶包山，但因為呢隻小農社會嘅集體活動，帶有部落色彩，兼散播一種飢餓氣氛，又試過一年，成座包山冧檔，造成傷亡，前殖民地政府為協助長洲居民與國際接軌，提高小農社會文明素質，於是毅然決定將搶包山項目，列為非法！
點知「回歸」之後，香港向後退，「搶包山」又蠢蠢有復甦迹象！長洲搞咗一個「搶包山選拔賽」，教壞青少年，竟然鼓勵縱容一啲攀慣山石嘅運動員，走去示範搶包山！
講到搶包山，又使乜練習吖？中國小農社會，衣食住行，查實全部都有搶包山嘅精神內涵！
嗱，例如前年七月十四盂蘭節，深水埗某米舖老細為酬謝神恩，在舖外大撒硬幣現金，有一蚊、五蚊、十蚊，結果就吸引咗成千上百攞開綜援嘅公公婆婆走埋嚟狂搶喎！老人家都咁好精力？梗係喇，有錢執吖嘛！