啟德啟晴邨鬧出「鉛水」風波，演變成屋邨鉛水風暴，令人好唔安樂，過往檢驗自來水質素，好少檢驗到水內有冇含鉛，世衛嘅清潔食水標準據講列出近一百種金屬嘅含量指標，但世界上有邊個城市真係跟到十足十，驗齊九十幾種金屬嘅含量㗎？要由水務署全港普查，全部百分之一百都驗晒？若如是，加水費必矣，橫掂香港水費已經幾便宜，二十年來都未加過咯。
勿論水費高低，自來水水質安全，係民生頭等大事，梁特首及有關官員絕不能掉以輕心，必須盡早找出鉛水之源頭，對症下藥，徹底解決，即使用上十億八億元都要啦，否則梁特首如何覺得自己得到中央「高度肯定」及「十分滿意」呀？搞唔掂政改咯，民生大事又束手無策嘅話，仲好意思去競選連任？今年十一月有區議會選舉，明年暑假有立法會大選，經政改一役，中央必定要求建制派在選舉搏命搶選席，增加議席，務求在立法會取得47席起碼，超越三分二，咁先至可以在各方面壓倒泛民主派。
何物「鉛水」，竟在此時流出，仲要係由民主黨議員黃碧雲「成功踢爆」，搞到九龍西建制派議員灰頭灰面，民建聯區議員竟然「佔領」上身，與群眾圍堵政府官員車輛，再發展落去，為挽回聲勢，民建聯區議員會否發動佔領啟晴邨、佔領葵聯邨呀？選舉政治會令政客瘋癲，我地呢班花生友，又有好戲睇。
問地盤總監惡佬明，鉛水從何而來？佢話目前未知真相，靠估就以不及格燒焊接駁口有最大嫌疑，其他可能原因包括：不知何人使用內地山寨物料而房屋署驗貨不力。惡佬明及另外一位工程師講到，啟晴邨係近年房屋署之「示範單位」，算係公屋中之豪華型，建築材料比較靚，故此胡錦濤訪問香港之時，特別「被安排」去啟晴邨參觀，依家偏偏就係呢個屋邨出事，房屋署真真冇晒面，現任運房局局長張炳良大可將責任推返俾已退休嘅前局長鄭汝樺，梁特首又可以推晒落曾特首身上。但腳踏實地咁講，梁特首、張局長以至發展局長，你地盡可推卸過往責任，搵法官委員會追查原因，但放在面前嘅責任，冇得推，就係fix the problem，搞掂食水安全，勿讓市民日日擔心！