接連有大學舉行開學禮時，有學生代表因為談及「港獨」問題，畀一眾特區高官狠批，自由黨榮譽主席田北俊今日接受民主黨劉慧卿網台訪問時就力排眾議，田少話呀，覺得就港獨問題「研究下無大壞」，佢話明白中央同特區政府覺得「港獨」言論唔啱聽，但佢就覺得喺教育過程中，即使嗰樣嘢係學校或者家長唔支持，畀學生討論吓並無壞處。

田少又話，以前都有建制派講過，好多嘢經討論後，可以決定唔去做，例如自殺、吸毒等議題，若能喺教育過程中，能夠話畀學生知道問題正面同反面之處，學生就會有自己睇法，坦言「獨立有獨立嘅好處，亦都有佢嘅壞處」，認為「港獨問題應該可以傾嘅」。

至於支持曾俊華選特首嘅田少，被卿姐問到覺得林鄭上任特首至今做成點時？田少就話自己「可能見過鬼怕黑」，所以覺得林鄭做得比梁振英好好多，佢唔覺得林鄭做得好差，社會更比之前「和諧咗」，認為林鄭同泛民主派議員合作亦好好多，做返特首同特區政府應該做嘅嘢，令建制派唔使成日收西環電話箍票。

對於梁振英近日頻頻向評論UGL事件人士發出律師信，田少就話呀，如果對方真係覺得自己無問題，「就唔需要咁擔心咁多人問嘢、咁多人去查佢啲嘢」。對於689不斷喺Facebook撰文鬧港獨，田少相信梁只係想做畀北京睇，自己比林鄭「仲政治正確」，但田少認為，如果唔係689嘅言論，根本唔會咁多人去聽陳浩天港獨演講，「今次真係多得佢（689）唔少」。