由孔劉、金高恩等人主演、喺Now TV跟播嘅tvN人氣韓劇《鬼怪》，於上周五播出第13集，並於本周六大結局。第13集就講到孔劉要用身上把劍先殺到奸臣厲鬼，佢得知呢一點後先默默交代之後嘅事，並喺天台吻別金高恩，呢一幕令唔少劇迷為之心痛。

而呢一幕仲引起網民熱烈討論，唔止係因為呢場吻戲令網民一齊心痛，更加係因為有網民發現孔劉舌吻金高恩！雖然喺劇集播出時畫面偏暗，而鏡頭又係一閃而過，不過就有網民十分「好心」地將畫面調光，更整成GIF動圖擺喺網上開心Share。

而網民嘅留言仲相當搞鬼，事關劇中金高恩係孔劉嘅初戀，喺世上生活咗900年嘅孔劉應該係連初吻都未有過，點知經過幾次同金高恩嘅咀嘴之後仲學識舌吻，網民立即話「唔似900年未咀嘴過嘅人」，亦有唔少網民話睇到心跳加快0添，認真誇張。

不過其實，現年25歲嘅金高恩現實生活中已經有一個大佢17年嘅男友申河均，唔知男友睇到有咩反應呢？

另外，孔劉所屬事務所今日公開咗其天台殺奸臣厲鬼一幕嘅花絮相。此外《鬼怪》劇組今日表示將於下月6日拉隊去泰國布吉旅行慶功，據知一眾主演正調整個人行程，希望可以一齊參加。