長實馬鞍山酒店海澄軒落成,開始招租,商場要指定行業至租得。長實最新一期刊物顯示,海澄軒套房最細623呎,標準單位677呎,兩房兩廳至三房兩廳,月租六千八百元起。唔收按金,租期又可自由選擇。發展商喺馬鞍山廣場整咗個示範套房。
至於商場部份,最近有一家酒樓,以月租十二萬承租近1.25萬呎,呎租唔使十蚊。
間酒店地皮曾鬧到滿城風雨,政府喺97年底推出招標,98年3月公布結果,由長實以一億二投得,每方呎樓面地價只係二百蚊,俾人狂抦,話係官商勾結。
蘭西最近睇政府公布嘅資料,酒店嘅建築成本係6.32億,即每方呎千一蚊有找。假如計埋利息等支出,每呎總成本應該都係千五六蚊,總成本應該唔使十億。
若果全部租出,回報率應該都有約八厘,比起一般酒店和味得多。不過當日以超低價投地,都係得咁嘅回報,又似乎少咗啲喎!
鴻運客得車位
小欖愛琴海岸前晚內購,首名透過鴻運買樓嘅幸運兒,即場獲發展商送出一個車位。鴻運新界區高級區域經理劉志傑話,買家籌號係10號以內,現居元朗,用280萬買入3座10樓E單位,面積1041方呎。
劉生重話,送畀內購買家嘅歐寶全新型號Corsa房車,好快會抽獎,有40幾個客爭呢部車,即係話鴻運做到40幾個內購。