第八場華商會盃,兩匹機會馬「喜蓮標緻」同「一寶」陣上大鬥法外,兩隻馬嘅主人仲鬥靚、鬥埋青春不老㖭!
43歲嘅「一寶」馬主李嘉欣係88年港姐冠軍,佢個樣真係年年都冇變。至於「喜蓮標緻」馬主胡家驊太太吳婉芳,一樣咁犀利,識得將時間停留。佢係86年港姐亞軍,46歲嘅佢生咗三個仔女,最近入馬場拉頭馬,咦,乜好似食咗防腐劑,話佢廿零歲都有人信囉。佢哋兩家人其實好friend,早排「一寶」贏二級賽,李嘉欣冇出現,吳婉芳有拉頭馬之餘,仲做埋代表領獎。呢對80年代港姐長年累月狀態Keep得咁好,估唔到旗下馬匹都有佢哋嘅影子。「一寶」上仗一級賽落敗,純粹冇運受困,賽後韋達話明隻馬其實猶有餘力,輸得好唔抵。而「喜蓮標緻」亦以準繩見稱,1400米跑過五次一冠三位,亦係上屆此賽冠軍。兩位媽咪級靚女,鬥樣就不分勝負嘞,愛駒鬥快就唔知誰勝誰負呢?