吳浣儀、李思欣同林作近日忙於為舞台劇《蓉姐做的湯圓》做綵排，佢哋三人喺劇中緊扣，吳浣儀扮演老工人，湊大思欣，由於思欣家境富裕，加上獲家人寵愛，佢喺劇中性格任性，當思欣嫁畀林作，一直食住老公，林作對老婆百般遷就。

思欣話同林作扮演兩公婆好搞笑，佢話：「我角色性格反叛，成日鬧林作，雖然我哋扮兩公婆，但冇親熱場口，最多攬吓，我好大女人，不停鬧林作，佢係小男人，不過有次鬧到佢爆seed，反擊番我。」

思欣強調現實生活係「馴服人妻」，從不鬧老公范振鋒，兩人相處以和為貴，佢大爆老公有時哦佢衣着太性感，思欣抑壓已久：「呢個角色鬧番老公，戲裏可以盡情發揮。」林作認真唔好彩，不過佢坦言戲裏戲外，佢都係小男人：「我成日畀女朋友食住，係死狗，咁多年都係咁，冇一個例外。」

林作認真唔好彩，首次演舞台劇嘅林作，被眾前輩大讚演得放兼唔怯，佢話：「多飲酒，你個人就鬆。多啲喺老蘭搵靚女搭訕，你個人就放、唔怯。唔當舞台係舞台，或者當你個世界就係個舞台，你個儀態就會生活化。」該劇將於本月29日到4月1日喺理工大學賽馬會綜藝館上演。

精選娛聞，喺晒《娛果》
http://fb.com/appledailyent