本港幾份左報逢中必讚，爭住為北京塗脂抹粉，《文匯報》就護主護出笑話，呢件事同一名疑似五毛黨嘅高登友「tiffany_chan」有關。
高登討論區日日熱爆，相信被中方睇中，不時有疑似五毛黨出現。呢位陳小姐因經常口談愛國愛港，鬧示威請願人士，被認定係五毛黨，高登仔好想起佢底。

聲稱大機構被人利用

有高登仔寫帖話用「×××@locpg.gov.hk」嘅電郵（×係代稱），都可以註冊做會員。「locpg」就係香港中聯辦嘅簡稱，一眾高登以為有料到，覺得有高人暗示陳小姐係中聯辦打手，有人更喺facebook設立「一齊去中聯辦搵tiffany_chan」，約定今年平安夜去搵佢，明顯係玩嘢。
陳小姐係咪中聯辦中人，其實冇辦法證實，點知《文匯報》呢個星期四出咗篇《魚目混珠：網友狂踩社民連郵址『連累』中聯辦》嘅報道，卻再次令陳小姐紅爆。
報道話，啲大機構名稱相近嘅電郵，常被人非法圖利。《文匯》記者「鄭治祖」話上中聯辦網查過，發現中聯辦係用「@locpg.hk」，唔係「@locpg.gov.hk」，話中聯辦呢次可謂無故被連累，叫「高登仔」以後唔好俾網絡政治騙案所騙。
高登仔不憤被當儍仔，齊齊發功，有人查域名註冊，發現www.locpg.gov.cn同www.locpg.gov.hk都俾中聯辦註冊咗。簡單啲講，輸入呢兩個網址或者www.locpg.hk，都可以去到中聯辦網站首頁。

出嚟澄清鬼拍後尾枕

IT知識水平偏高嘅高登仔話，想用「@locpg.gov.hk」做電郵地址就得中聯辦一家，更何況gov.hk只限政府機構註冊。高登仔話如果陳小姐只係普通人，用不着《文匯》出嚟澄清，正係此地無銀三百両，鬼拍後尾枕，「根本冇爆過邊個用中聯辦郵址，係文匯自爆咋」。佢哋話本來都唔知locpg.hk同locpg.gov.hk嘅關係，多得《文匯》提供中聯辦資料，拍手掌話成功放曲線釣大魚，「無私顯見私，越描就越黑，今次真係護主護出火」。
mailto:[email protected]