多得劉華，香港人越嚟越重視消費者權益，不過刁民卻因此與日俱增。香港上一代「劉華」人辦，相信係一名為咗13仙同銀行打官司嘅學生，當時報紙話呢單可能係香港司法史上，涉及金額最少嘅官司。1981年3月23號，22歲嘅浸會書院學生潘志雄去小額錢債審裁處追討海外信託銀行。事緣佢拎張老竇畀佢嘅支票去銀行攞600蚊，銀行職員話支票曾經塗改，個簽名筆迹又有啲亂，所以「彈票」唔畀佢攞錢。
潘志雄基於「消費人」權益毅然向銀行索償，按當時法例，法官指最多可追討損失連一日利息共13仙。銀行代表律師不服，話職員有逾30年辨認簽名嘅經驗，若然敗訴，可能影響銀行運作，要求將案件轉介地方法院，法官認為有理，於是批准。潘志雄當時喺庭外死撐，話會搵個警察friend做筆迹專家出庭，證明老竇張支票係堅嘢喎。