噚日真係星光熠熠耀保良！恒地（012）主席李兆基（四叔）親自宣佈將私人一幅元朗農地，捐畀保良局做青年宿舍。為隆重其事，保良局八位總理齊現身，幾乎逼爆四叔嘅會議室，但同時造就四位《福布斯》富豪阿太嚟張大合照。四位阿太仲要圍住同一款Hermès（愛馬仕）絲巾，好鬼襯，唔知佢哋會後有冇約埋去打番四圈呢？
大家對呢四位城中闊太一定唔會陌生，佢哋經常喺馬經、財經同娛樂名人版出現，噚日佢哋唔係喺ball場或馬場聚頭，而係一齊走上去恒地位於中環國金嘅寫字樓搵四叔。

四太傍住四叔好貼心

四叔捐地畀保良局，其中一個重要人物當然係保良局董事會主席，即係賭王四太梁安琪。四太仲傍住四叔出嚟，全程都表現得十分尊重四叔。金利豐（1031）老闆娘朱李月華係四太手帕交，加上佢係保良局副主席，盛傳下屆極有機會接替四太做保良局主席，當然要出現喇。
莎莎（178）老闆娘郭羅桂珍與「玩具大王」蔡志明太太蔡李惠莉雖然冇乜出聲，但係都set行頭、化行妝現身，好畀面㗎。蔡太本身開辦幼稚園，特別溫文。
有冇發現四位阿太頸上面圍住同一款式嘅絲巾呢？原來呢條絲巾係四太舊年年初擔任保良局主席時，買嚟送畀其他女總理嘅，男總理就有橙色領帶，全部都係Hermès。據講，呢款Hermès絲巾大約四千幾蚊，物「輕」情義重，四太應該係想保良局一班總理每次都可以襯晒咁出席活動，顯示佢哋成班人都好齊心為保良服務。
如果朱太真係成為下屆主席，唔知佢會送乜呢？

李華華
mailto:[email protected]