電盈嘅薄扶林豪宅盤貝沙灣，第一期話咁快全部賣清光，發展商今晚就同勞苦功高嘅四間代理行，喺金鐘港麗酒店擺設慶功宴，順道頒發四個「至威水」獎項，包括邊間代理行賣得最多單位，最多外籍客成交，單一最高成交金額，同埋單一促成最多宗數代理。
祝捷之餘，當然係部署第二期名為「貝沙灣南岸」嘅銷售攻勢。
聽電盈雲迪（顏金施）講，示範單位已經做得七七八八。早排電盈基建主席李智康親自喺歐洲搜羅唔少珍品，諗住擺喺示範單位，聞說，今個中秋佳節，就可以一睹呢個將令市場嘩然嘅示範單位。

今晚一期搞慶功
蘭西記得個盤第一期開賣嘅時候，正係西方嘅情人節，電盈重喺當晚搞咗個情人節之夜，邀請一眾貴賓出席，盛況空前。今次第二期展開攻勢，就揀意味人月兩團圓嘅中秋佳節，睇嚟都唔嘢小。

代理搞記者會迫於無奈
近期新盤記者會又多番，好似噚日咁，就有成十一單。不過細心睇吓，發覺好多都係由代理出面，發展商到時現身。
蘭西聽聞原來係發展商要求代理咁做嘅，所以就出現一間代理行一日有三單記者會，連代理都感到無奈。咁即係經紀除咗推銷，重要做埋公關啦。