做官最緊要識「交波」，幾千個「2009東亞運動會口號創作比賽」參賽者監護人嘅姓名同身份證號碼等重要個人資料，可以上網用Google輕易查到，事件5月已經發現，當時處理呢件事嘅康樂及文化事務署前署長王倩儀竟然拖到8月，即係佢離任都唔通知被洩資料嘅市民，要喺上個禮拜俾傳媒踢爆，先至由新署長周達明公布，充份表演咗一次美妙嘅腳法。
已調任環境運輸及工務局常任秘書長（兼任環保署長）嘅王倩儀，噚日終於出嚟，但係就一副完全置身事外嘅態度，重死撐話「絕對冇隱瞞」，佢解釋話，佢當時要先問吓其他部門嘅意見，又要同Google跟進。

政府高層唔滿意

但係據八方收到料，政府高層對王倩儀嘅處理手法相當唔滿意，認為佢冇理由留低個炸彈，自己唔一手一腳拆埋至走，反而卸畀下手拆，搞到唔知點收科。
其實王倩儀署長隱瞞事件已經唔係第一次，相信大家重記得「捉蟲事件」，04年康文署轄下十幾個泳池發現有紅蟲，王倩儀同班康文署高官否認泳池衞生有問題，仲聲稱有人搞破壞，要報警處理，結果俾人踢爆康文署早知泳池水質有問題，申訴專員公署05年發表報告，點名狠批王倩儀危機意識不足，處事欠透明度，令簡單嘅事件變成部門誠信問題。
官場嘅八方好友話，係人都知環運局長冬姨對下屬絕不手軟，睇吓運輸署前署長霍文就知啦，表現唔好隨時會冇得留低。
政府高層調王倩儀做冬姨手下，其實係畀最後一次機會佢，如果佢仲唔醒醒定定，就會由得冬姨斬佢。