當年今日

封小平似肥佬黎 - 左丁山

蘋果日報 2002/01/06 00:00


第一次見亞洲電視行政總裁封小平,聽吓呢位前共產黨講電視節目。問佢點解叫做「小平」,係唔係崇拜鄧小平?封總話:「唓,我喺廣州廣雅中學讀書,同班已經有兩個同學叫做小平啦,呢個名喺大陸好普遍。」
數吓手指,佢出世嗰陣,鄧小平最多只係第五、第六號人物,居毛澤東、劉少奇、周恩來、朱德、彭德懷之後,當時又係冇理由崇拜鄧小平啫。
「廣雅書院」係晚清名人張之洞(湖廣總督)創辦嘅,已經有一百一十幾年歷史,位於廣州西區,係數一數二嘅廣州名校,封總話深圳市長于幼軍就係佢嘅師兄,珠海市委書記係佢同班同學,唔少校友在廣東省、廣州市政府當高級幹部,唔怪得佢上到廣州深圳咁吃得開啦。
封總好健談,一味講,一味食煙,飲可樂,只係唔食嘢!左丁山就猛咁食,只聽不講。封總不愧為廣州名校出身,語言用字精到,口才更佳到極,咦,全部冇廣府人歇後語噃。不過講咗半個鐘,左丁山問佢點樣管亞視,如何撥亂反正,佢就當堂彈起,啲廣東話愈發流利,㩒都㩒唔住,似足肥佬黎開鋤書大會,XYZ阿媽阿叉打到嚟。聽真吓,佢啲管理作風同口脗,又係肥佬黎咁嘅風格,睇嚟封黎二人都係來自廣州,MBA學生請佢兩個坐埋開seminar講管理,包保聽出耳油,大叫有料到。