保良局教育服務70周年今日喺銅鑼灣舉行大型巡遊匯演，應屆保良主席陳細潔，仲有Kellyjackie現身支持。

主席陳細潔話有一連串慶祝活動，安排咗1,300位學生，喺總局同銅鑼灣街頭表演，俾機會佢哋學以致用，過程多謝校長同家長嘅支持，除咗今日之外，聽日沙田有個回歸盃，係一啲學生嘅足球比賽，會有各類型嘅運動賽事慶祝。

Kellyjackie就係幫呢個活動嘅主題曲填詞，佢話：「我以前都係保良局嘅舊生，我知道有呢個周年誌慶，舊老師搵我幫手，我讀過兩間保良學校，讀書成績唔算好好，又唔係差，但係花好多時間係中樂團度，又係讀女校，所以冇咩機會接觸男仔。但係以前有隔籬學校，介紹男仔認識，可能我冇殺傷力，所以都係望我隔籬啲女仔，自己知自己事。」

最近感情有冇著落？佢話：「o依家有目標了解緊，有3、4個，早排喺深圳返香港，遇到一個埃及定中東男士，本來係問路，但係搭車嗰陣全程坐我隔籬，大家用英文溝通，交換咗電話，大家係了解中。」