國際賽日精英雲集，整日賽事水準都很高，舉行至今未夠一個月，已經有「有得威」再出成功連捷，而當日跑第四的「喜悅繽紛」及「精算博奕」翌仗亦贏馬補中。

今次第八場三班1400米「瑞士雄心」，國際賽日在港初出只輸兩個半馬位，今鋪加強配搭用巴度，擺明車馬打真軍。

「瑞士雄心」在新西蘭九戰三勝，成熟足夠的五歲自購馬，上仗在港初出留前鬥後，最後百五才移出望空衝，末段造22秒85快時間，後勁仲快過再出幾乎贏的「勝利導航」，走勢拍得住該仗頭馬「百勝龍」，目前評70分有利，至少有兩W在手。今次增程二百更啱追，後上馬排12檔影響不大，巴度騎後上馬夠硬淨，坐位望贏做得到。

「三思飛駒」今季出賽頻率正常，證明已走出傷患的陰霾，前仗跑同程後上得第五，末段造22秒44快時間，後勁僅次於翌仗贏馬的「勝得威」，在三班跑同程惡到暈。

「友誼之星」在外地兩次贏馬都戴眼罩，今次縮程而加眼罩，做法夠正面，值得憧憬。「嘉應小子」今季重拾競賽意慾，只負117輕磅，亦可加入戰團。