明日元旦日（1月1日）頭場四班1600米只得九匹馬參賽，賀賢馬房「神速寶」在港出賽13次，其中有八次都係由田泰安主理，估唔到上場跑國際騎師錦標賽，抽籤配馬都係抽到田泰安操刀，並出戰嫌短的谷中1000米得第三。

「神速寶」早段預咗唔夠快，但入到直路，好似裝上摩打咁，喺外疊撲上做出全場最快的22.54秒，能夠喺唔太合腳法的路程，追入一席季軍，連安仔都感到驚喜。

明日繼續由呢位有緣人執韁，「神速寶」回師1600米，本身於上年元旦日正正於同班同程入Q，當時只輸畀現居三班的「首飾大帝」一條頸位，呢場跑第四的「快閃的」之後在四班兩捷，現時已升至第三班。

「神速寶」可惜因腳患影響，至今仍未贏馬，但以上場嘅姿態，健康似乎已經好番，但願今年元旦日能夠表現比上年更勝一籌，以打開本身勝利之門，並讓幕後於新一年有個好開始。