令女明星趨之若鶩嘅殼王陳國強又出手！今次唔係俾人磨爆，而係擴張佢嘅傳媒事業王國版圖。話說鄒文懷檔嘉禾娛樂噚日宣布，向殼王旗下嘅漢傳媒發行2千萬元可換股票據，漢傳媒可以用每股兩毫二嘅價錢，換到6.4%嘉禾股權。而根據最新股東排名，殼王排第五，創辦人鄒文懷仲係第一；佢嘅波友同救命恩人超人李嘉誠排第二，由EMI同埋鄭中基老竇鄭東漢合組嘅TyphoonMusics排第三；第四嘅係一個基金。
點解入股嘉禾？殼王話睇中嘉禾發行網絡，可以配合佢買落嗰啲娛樂及媒體生意。不過好奇怪，漢傳媒話佢哋現時喺中國同香港製作電視節目，呢啲節目好自然喺殼王至緊張嗰瓣無綫收費電視播啦，唔通喺嘉禾戲院播？

磨合工夫耍家

殼王近排同本港電影圈嘅關係都好密切，早排由鄭中基及葉璇主演嘅《至尊無賴》就係由佢投資；今個月初有人爆響口話，陳國強會投資由王晶拍嘅《臥虎》，女主角由自稱同殼王唔熟、只見過兩次面的郭羨妮（圖二）做。殼王出咗名將二三線股包裝好當殼賣賺錢，唔通佢入股嘉禾，就係想將呢套功夫用到電影界，有系統咁發掘二線女星做主角，令佢哋升價十倍？
睇番單刁，令華華佩服嘅係，香港電影界兩個教父──六叔邵逸夫同埋鄒文懷都俾佢搞掂！殼王先係啃咗六叔檔唔知點收科嘅收費電視，𠵱家又借錢畀鄒生檔嘉禾，兩個大纜都扯唔埋嘅電影大亨，都俾佢磨合到，佢嘅磨功真到家。
李華華