ViuTV第一次搞選美，玩足綽頭以Angel(天使)同Devil(魔鬼)做主題，今日晉身決賽嘅佳麗，有學生、人妻、人母、失婚婦、星二代大雜燴。

當中全場最細粒嘅4號鄭嘉雯(Jennifer)，身高只得146cm，今年只得23歲嘅佢，已經結咗婚兼有一個仔。

至於同為人妻嘅6號趙詠瑤(Kimi)、10號林慧妍(Yen)，兩個本身都有經歷。一早公開認咗全身上下大執過嘅翻版謝安琪Kimi，今日喺ViuTVfb官方專頁嘅介紹，就話佢喺「重塑型」D級女神，上月尾佢成功晉身複試，3日後就嫁俾拍拖4年嘅圈外男友，榮升做人妻。

至於10號Yen，細個嗰陣，同阿Sa拍過港台Y2K，被高登友封為56K網絡女神，之後佢就淡出娛圈，仲做埋人妻。不過人妻Yen依然hot，成日喺Igpo三點式相。早排佢喺澳門玩poolsideparty嗰陣，仲俾人影到同關楚耀攬頭攬髻，俾人話佢背老公暗撻關楚耀。

最後仲有今日首次現身嘅失婚婦陳意嵐(Tarah)，29歲嘅佢其實做過杜汶澤化妝師，更試過全裸試鏡，又接拍過邱禮濤執導電影《選老頂》及《兇手還未睡》。而佢個前夫就係歌手陳詠謙，不過二人喺14年就離婚，前夫今年再娶做教師嘅圈外老婆。