李八方online︱梁振英斥楊潤雄「為官避事」唔公開被懲處教師姓名 教育局反駁要基於事實
李八方online梁振英楊潤雄蔡子強
港府喺中央造勢之下加強整肅教育界，教育局局長楊潤雄星期一曾揚言，若教師做出普遍社會不可接受嘅行為，如用惡毒言語咒罵或詛咒他人，當局會採取行動。不過，一向秉承北京「戰狼」風格嘅前特首梁振英對楊潤雄所指嘅「行動」仍然不滿，喺Facebook向楊潤雄發炮，話佢係「為官避事平生恥」。教育局回應時就不點名反駁，指從來冇抱住「唔好搞大佢」嘅態度，對說法不明所以，又話批評時需要基於事實。
事關梁振英日前喺Facebook對楊潤雄大表不滿，質問教育局「至今採取了什麼行動？就是譴責和警告，但是堅持不公開被譴責和警告的教師的姓名，也不公開涉事學校的名稱，家長被蒙在鼓裏，總之是『你信我啦，我做咗嘢，唔好搞大佢』」。佢批評教育局喺大是大非嘅問題上，「這是負責任的表現嗎？」最後仲寸楊潤雄係「為官避事平生恥」。
教育局之後回應傳媒時就話，當局無懼失德教師同壓力團體嘅挑戰，從來冇「唔好搞大佢」嘅不負責任態度，仲話對呢個說法不明所以，希望大家發表意見或批評時，要建基於事實。
除咗向楊潤雄開火之外，梁振英亦不忘狙擊中文大學政治與行政學系高級講師蔡子強。因為蔡子強今日喺《明報》文章指今年冇接受大學Offer嘅文憑試考生人數急升，情況讓人吃驚。梁振英隨即藉機譏諷，話象牙塔外嘅人對呢個情況唔會「吃驚」，因為「家長就是對陳健民這樣的中大教師、段崇智這樣的中大校長、吳傲雪這樣的中大同學，葉芷琳這樣的港大學生會會長，避而遠之」。
-----------------------------
-----------------------------