「第60屆藍絲帶電影獎」頒獎禮今日於東京舉行，得獎名單已於日前揭曉，新垣結衣憑《乒乓情人夢》首封最佳女主角，《鳥獸行》阿部貞夫揮低大熱嘅《啊，荒野》菅田將暉奪得最佳男主角，《啊，荒野》就奪最佳電影、最佳男配角（中山裕介）等合共三獎，去年爆出不倫戀嘅51歲女星齊藤由貴靠是枝裕和作品《第三度殺人》贏得最佳女配角。

頒獎禮由松山研一與大竹忍任司儀，新垣結衣束起頭髮以一襲黑色長裙現身，結衣BB於10年前憑《戀空》獲得最佳新人獎，佢話冇諗過靠封后再踏上藍絲帶頒獎台，仲話好開心能夠報答到劇組人員。大竹忍現場讚結衣10年來都冇乜變，結衣BB就話：「今年30歲了。」提到結衣BB靠《逃避雖可恥但有用》跳戀愛舞獲大讚可愛，佢就話自己冇乜特別感覺，都係靠工作獲得大家嘅讚賞。而今屆影帝影后將接棒任下年藍絲帶司儀，結衣就自爆平日最享受喺屋企嘅時間，平日好少睇戲：「深夜一時在家聽音樂、飲酒，喜歡時候就睡，在家的時間最開心。平日很少機會看電影，如做司機要再努力。」

至於齊藤由貴曾於32年前得藍絲帶新人獎，佢於台上致辭時話當年點樣獲獎已經唔記得，經過多年能夠再次獲獎感覺好似夢一樣，去年捲入不倫醜聞嘅齊藤由貴呢日獲獎不時保持笑容，其母亦有到場支持，佢獲獎時望向觀眾席後方，並眼濕濕感謝媽咪：「媽咪，對不起，感謝你前來支持。」

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent