今年內地股市升勢凌厲，但如果揀錯股，睇到人哋買嘅股不斷升停板，自己嘅就唔曉郁，都咪話唔「苦過弟弟」！
內地網友股指期貨喺今年1月初，以5.9元入咗工行A股，𠵱家過咗4個月，大市已經升咗四成，好多股票都升超過一倍，但隻工行唔單止冇升，仲調轉頭逆市跌10%。佢忍無可忍，將手頭所有嘅工行沽晒，費事眼寃，仲話就算隻股升番，都唔會後悔。

提錢走人撤戶口

𠵱家佢入咗另一隻業績唔太好嘅低價股，反而表現唔錯，升咗3%。正所謂愛嘅反面就係恨，工行咁「唔生性」，股指期貨準備將喺工行嘅錢都全部攞走，撤銷戶口，永遠都唔同呢間銀行發生任何關係。
Saturmstar同X5112001亦係同一命運，畀隻工行搞到晚晚發噩夢，同樣都係蝕錢沽貨離場，約莫冇咗15%。網友基層人員話：「工行唔係畀散戶玩嘅，係政府用嚟調節大市。」
BvJ就話炒股有時都幾無奈，「有啲股就好似工行咁，揸上幾個月甚至半年，個股價可能郁都冇郁；但係當你一沽咗，佢第二日就即刻暴升，真係好嘔血㗎！」
內地揸工行A股嘅股民慘，但香港揸佢H股嘅散戶亦未必好過，今年初，工行（1398）由5.15元高位反覆下插，不斷喺四個半水平徘徊，上周五收報4.34元，累積跌幅達16%。
http://bbs.stock.163.com/agu/1018968.html