利嘉兒（Lily）和劉姓製衣商人老公Bong，結婚8年，今年高齡懷孕，上周（19日）在舊山頂道嘉諾撒醫院誕下女兒，體重7.2磅，母女平安，更趕及中秋前出院，第一次過三人中秋節，人月團圓。

利嘉兒指由於開刀日期撞正「山竹」打風後，令她擔心風災冧樹封路，幸好順利入院。抖了幾日，Lily 精神不錯，「BB都幾肥美，屋企人都話無諗過我咁細粒，生到個BB咁墜手。BB依家食得、瞓得，好多表情，成日偷笑，姑娘話佢係開心果BB。」

老公陪入產房兼剪臍帶，利嘉兒：「好多蝦碌嘢，老公本來準備入到黎就係剪臍帶，但啱啱見到醫生將BB放喺我個肚拎出嚟個吓，血淋淋嘅一幕，佢都有啲嚇親。之後，個外籍麻醉師話幫佢揸機，錄佢剪臍帶個part ，點知剪完睇返，係空白，原來佢㩒錯制，冇錄到！呢啲冇得take two ，老公安慰我，話唔緊要啦，咁珍貴嘅畫面，已經留咗喺佢腦中同心中。」

女兒可愛圓碌碌，似足老公，利嘉兒為她改名劉書雅，英文名Karyssa。「中英文名都係我自己改，因為我鐘意女仔有書卷氣，希望佢係優雅嘅女仔。」英文名Karyssa來自古希臘，有「充滿愛」、「被愛的」嘅意思，「我想佢有愛呢個特質，人生中充滿愛，亦明白愛人、有愛心及愛惜小動物。」

精選娛聞，喺晒《娛果》
http://fb.com/appledailyent