唔知係咪俾人鬧得多成日密密加，麥當勞踏入新嘅一年竟然減價。麥記由聽日起喺傍晚5點至9點嘅晚餐時段，將三款主打套餐豬柳蛋漢堡餐、巨無霸餐同埋脆辣雞腿包餐減價兩成，全部都係賣20蚊。小妹上麥記嘅網站睇吓三款套餐嘅原價，分別係$24.9、$25.8、$26.8，計一計，減幅依次係20%、22%同25%。

35周年賀一賀

呢排經濟好番啲，唔少公共機構話加價，麥記點解轉死性減價？小妹打畀麥記嘅公關姐姐Kylie八吓。佢解釋話今年係麥記35周年，所以咪推啲優惠賀一賀。呢三個套餐都係第一次減價，減幅都係歷嚟最大，同埋第一次喺晚巿做優惠，等啲打工仔放工都有平嘢食，「揀呢三個餐做優惠，一嚟三款都係最受啲客歡迎，二嚟包括晒牛肉、豬肉同雞肉三種肉，啱晒唔同人嘅口味。」
Kylie又大賣關子，話今次減價只不過係今年嘅頭炮，之後仲陸續有減價優惠，又強調下次比今次減得仲勁㖭。小妹聽住先，千祈唔好出啲茅招將個別item減價，跟住又話啲食材價格不斷上升，整體要加價，咁樣只會犯眾憎。
電郵：mailto:[email protected]