想當年憑啤酒廣告中「奀妹」一角走紅嘅台灣女星傅天穎，自從同台語傳統戲曲弟子老公陳子強5年前離婚以來，不單只要做單親媽媽照顧現年歲、患有癲癇症嘅獨生子小天子，同時又與前夫爭拗不休（新聞連結： https://bit.ly/2pDHwIq ），可謂身心俱疲。

今日有台灣傳媒指，日前奀妹喺facebook留言講「想一了百了」同「一走了之」，嚇得佢班朋友擔心奀妹係咪因為要獨自照顧囝囝同媽媽頂唔順而「爆煲」，紛紛留言俾佢，勸佢千祈唔好諗埋一邊，怕佢走咗之後，傅媽媽同小天子冇人照顧。

其後奀妹受訪時話，因為自己上個月確診患上哮喘，每日都要食藥，遇到天氣變冷或霧霾等空氣質素唔好嘅日子，佢就加倍難受，加上傅媽媽年紀大，有心臟病、腎病、關節等病痛，個仔小天子嘅癲癇症又未好番，身心俱疲嘅奀妹先上fb發泄一下，但現已刪文。奀妹受訪時又話因為演藝收入唔多，要靠直銷維生，每月開銷達四萬新台幣（約10,735港元），家陣都係僅僅夠俾，而佢所謂嘅「一走了之」，其實係想返去佢最熟悉嘅香港，呢邊又朋友多，可以俾佢放個假輕鬆一下。

精選娛聞，喺晒《娛果》
http://fb.com/appledailyent