樂基兒（Gaile）今天喺銅鑼灣出席先施百貨公司活動，同場展出由其經理人Joey操刀嘅相片展，好友Danielle同胡孟青都有到賀。

Gaile心情靚靚，指同經理人合作17年，感情要好，佢話：「啱啱嚟到香港係Joey發掘我做模特兒，7年前喺紐約發現佢影嘢好叻，幫我影咗好多相。我暫時未考慮出寫真，不過佢已經儲咗我哋好多靚相，佢影建築物都好靚。」問到Gaile可知陳善之同前夫黎明傳鬧不和，結束20年的經理人關係？Gaile透露年多前已結束同百士活嘅合作關係，對此事全不知情，佢話：「冇留意，呢啲事我唔參予。」問到陳善之嘅動向？Gaile表示唔清楚：「希望佢自己答返，唔輪到我答。」

講到關之琳自爆離婚，樂基兒就話：「我都唔知佢結咗婚！我唔清楚，因為我唔識睇中文，唔好話其他人，就算自己嘅嘢都唔係咁清楚，關於人哋嘅嘢唔答，問返佢自己。我哋冇見過，但知道佢好靚。」問Gaile結婚會否公開？佢話：「呢樣嘢好個人，結婚講唔講係佢哋自己選擇，冇話對與錯，個人如果唔鍾意講，都唔係好大件事。」

至於娛樂賣淫案，樂基兒就話：「呢樣更加唔知，問返佢哋，可能唔係真。我唔識睇中文，除咗聽你哋講，都冇聽過。」Gaile更肯定地表示從未有人「問價」。