林嘉欣、鄭欣宜及徐天佑等今日去到圓方出席《小馬寶莉大電影》首映禮。今次為電影主角做配音嘅嘉欣話：「我兩個女都好鍾意呢套卡通片，佢哋聽到之後都癲咗尖叫，話媽媽咪做得好啱，我今次冇做功課，主要問啲女有關齣卡通片嘅資料，佢哋講晒畀我聽啲角色邊個鍾意邊個。」嘉欣指家中有齊一套呢套卡通片公仔：「佢哋間中都會爭嘢打交，但係我唔會介入，等佢哋學習相處。」

之前意外斷腳嘅欣宜，仍然要撐住拐杖出席活動，佢喺電影中聲演一名壞蛋：「今次壓低把聲仲難過唱歌，但係好多小朋友都好鍾意，我都鍾意小朋友，但係都要遇到另一半，先可以有計劃生小朋友。」

至於已經係第三次為卡通片配音嘅天佑，曾經為人物、精靈及今次嘅動物配音，天佑話：「今次扮一隻貓，自己本身好鍾意貓，細個都有養，但係o依家老婆好怕動物。」天佑指自己今次好容易代入聲演，因為自己對貓好有認識，佢話：「身邊好多朋友嘅仔女知道我今次配音，原先平時唔叫我，o依家就主動叫我，自己都有生小朋友嘅打算，但係可能要忙完演唱會同埋手頭上嘅電影拍攝先。」

更多娛聞，喺晒《娛果》
http://fb.com/appledailyent