今日抵港嘅保羅普巴，可能係足球圈最「潮」嘅黑人球員，成日扮演潮流先鋒角色。好似呢一、兩年興起嘅Dab舞，美國籃球界好多人喺度玩緊，而足球界第一個開始呢隻舞嘅就係普巴，嗰陣仲踢緊祖雲達斯嘅佢，入波後就跳Dab舞慶祝，又經常擺出Dab嘅姿勢影相擺上網，後尾仲整埋個有「Dab」字樣嘅髮型，向呢種街舞文化致敬。

講開普巴個頭，就真係千變萬化，試過一個月變三次髮型，最出名有星星頭、音符頭同豹紋頭，而且好多球星都跟風，剪到類似佢嘅髮型。今次訪華，佢又剃咗個同自己內地譯名「博格巴」同音嘅波霸頭，唔知以後其他球星訪華，會唔會學佢咁將自己個中文譯名擺上頭呢？