賭王四太梁安琪噚日就喺中環置地廣場出現，唔見佢啲仔女喺身邊，大約四、五點佢就約咗四個女性友人喺一樓嘅茶座high tea，全場見佢講唔停、指手畫腳。原來鍾鎮濤同老婆范姜，就喺隔籬枱坐，埋單走人時就走咗去四太嗰枱打招呼，佢哋企喺度傾足15分鐘，應該傾緊時裝經，B哥更轉身展示佢件恤衫畀四太睇，四太仲伸手摸B哥件衫背脊嘅老虎圖案，似乎好欣賞。

B哥一家走咗之後，四太就同佢班女性友人繼續傾，仲拎咗一大疊擬似floor plan草圖同印有傢私擺設嘅紙張出嚟，猛手指指同佢哋研究，似乎商議緊裝修嘅問題。四太果然朋友多，傾咗一陣又撞到朋友，一位上咗年紀男士嚟度，今次四太更動身過枱同對方密密斟，似乎傾公事多。