英、西、德聯賽盃，加埋意甲開快車，無歐冠盃嘅周中同樣精采！我會建議大家集中火力喺意甲。至於聯賽盃，可以半放棄！
投資聯賽盃，我覺得有啲倒錢落海feel！以英格蘭聯賽盃為例，小弟仲記得上一圈爆到七彩！04年冠軍米堡主場迎戰乙組仔諾士郡，強陣出擊，包括有維度卡、馬卡朗尼、文廸達，可惜，最終都係輸波！如果真係要投資，我都係鍾意入球大細算啦。
聯賽、歐冠盃永遠係最重要，所以，咁多場英格蘭聯賽盃，我會選擇優質隊車仔、阿仙奴、曼聯，要入球細，1球贏對手。不過，我預計一定贏得好辛苦，話晒對手係中游球隊，唔使打歐洲賽，精力充沛！
至於西班牙盃，同樣都係靠估！有幾隊西甲波超班，大家可以貪心啲，5串1，馬體會、華倫、巴塞、西維爾同維拉利爾，穩穩陣陣，保本投資，收穫隨時好過啲無鬼用嘅MPF！

AC快啲買「細哨」

做人要有志氣，人哋睇唔起自己唔緊要，千祈唔好睇唔起自己！AC米蘭就好似真係放棄咗自己，知道無機會攞聯賽冠軍，搞到自己喺聯賽嘅成績差強人意！AC米蘭將會對住弱隊基爾禾，我諗會贏波啩……如果輸埋，大家估要買幾多個「細哨」至可以起死回生呢？
周鵬
商業1台《球迷集中贏》主持
電郵：[email protected]