佘詩曼今日喺青衣城出席「香港綠色日」啟動禮，獲委任為環保大使，阿佘表示喺日常生活中着重環保：「盡量喺屋企唔好開太多冷氣，如果天氣熱就好似我咁着少啲衫，仲有停車要熄匙。」阿佘又話拍戲開工多數會自備餐具飯盒：「尤其喺內地拍戲好，多時會全套連埋食物都預備好，除咗環保亦比較衛生。」

提到阿佘日前獲一班朋友為佢慶祝43歲生日（新聞連結： https://bit.ly/2M1nQZh ），阿佘笑言生日慶祝活動仲未結束，但過兩日就要飛天津做宣傳電影《洩密者們》。

問到收到咩生日禮物？阿佘話：「都是啲好實際嘅嘢，班姊妹送咗方便帶出街嘅化妝袋，仲有無線充電器同相機。」提到有fans喺網上留言話心痛阿佘仲單身，阿佘就話：「佢哋錫我啫。」又話姊妹們知佢工作忙，冇特登介紹對象俾佢。

精選娛聞，喺晒《娛果》
http://fb.com/appledailyent