聖誕前最後一次賽事，今日（23日）最高班戲碼係第九場二班2000米，除咗告仔隻「時時精綵」係馬迷焦點外，相信唔少馬迷都想睇吓大摩隻「活力歡騰」會唔會用回對上兩場放頭戰略，咁啱同場仲有另一隻摩廐馬「火箭駒」，「活力歡騰」放定唔放，隨時又直接影響最終賽果。

「活力歡騰」過去有表現都係用後上跑法，上兩場無啦啦走去亡命放頭，做電兔目的非常明顯。

競賽董事小組事後雖然有搵騎練查詢跑法，但係眾所周知，只係俾個機會練馬師帶小組遊花園，小組又唔敢話練馬師改策騎指示唔合理，只係話日後會繼續密切監察「活力歡騰」跑法。

馬會取消公佈賽前備案同更改策騎指示以來，牽涉馬匹突然改跑法的爭議越來越多，最新鮮熱辣嘅係上次（17日）日馬莫雷拉騎「平海福星」突然由後上改為搶放，結果大熱倒灶，好多馬迷都好唔滿意。

既然競賽小組講明密切監察「活力歡騰」點跑，咁究竟今日賽前，受薪董事會唔會要求大摩，交代一下「活力歡騰」今場戰略？

若果「活力歡騰」最終用回前領跑法，有冇表現都叫做連貫，但係若「活力歡騰」又突然改回用後上跑法，即係大摩推翻咗自己上次證供，咁小組又會唔會對練馬師有跟進行動？

若競賽小組賽前冇行動，事後先再搵騎練問話，其實係冇用嘅，呢種監察方式只係得啖笑。

根本競賽小組就唔可以成日俾練馬師牽住走，應該賽前就要練馬師講清楚跑法，就算唔向外公佈，於賽後報告亦應交代賽前練馬師已將跑法備案，咁樣先叫認真跟進監察，亦對公眾馬迷有交代，買落去輸咗條氣都順啲。

阿Joe