年23歲的港姐冠軍兼最上鏡小姐雷莊𠒇，出爐未夠一周，卻成為全城焦點。由於她憑鄭裕玲黑手兩票奪冠，在一片爭議聲下成為雙料港姐冠軍，無綫即被指有造馬之嫌，事後更爆出雷爸爸是香港十大設計師雷葆文，後台硬淨。雷莊𠒇當選後被評頭品足，她日前開live向網民還拖，表示不會放棄后冠及改變自己討好別人。

雷莊𠒇我行我素，讀者KT前日透過「爆相爆片」直擊素顏的她沒精打采獨自行街，跟選美台上的她相比，簡直判若兩人。讀者KT前日在電話說：「嗰陣我啱啱喺通利琴行行過，見到一個女仔好熟口面，個樣好面善，睇真啲原來係今屆港姐冠軍，佢由側邊嘅小巷行咗去厚福街，跟住上咗去H8。我見到嚇咗跳，佢個樣好似好肚餓，邊行邊搵餐廳。」

問到途人當時可認出雷莊𠒇？KT說：「得我認得佢咋，因為真係冇人望，所以似乎佢自己都知未有人認得，好真性情咁周圍走。」孭着黑色背囊的雷莊𠒇所穿的藍色露膊上衣，原來早於7月15日參選港姐活動時穿過，最大分別是兩個月前有化妝set頭，精神奕奕，而前日頭髮凌亂甚烏歪。

昨日雷莊𠒇和亞軍何依婷及季軍黃瑋琦，到佐敦出席領獎活動，雷莊𠒇明顯悉心打扮而來。對於素顏hea爆現身尖沙嘴，她大方回應：「個樣真係好差呀，我好鍾意去食大排檔，嗰陣周圍望搵餐廳，唔知有鏡頭對住。當選港姐後，難啲唔俾人認得，可能因我比香港女仔高，所以易啲俾人認到。」問她會汲取教訓，下次打扮後才上街嗎？她笑笑口說：「唔會喇，我覺得如果要放好多心機匿埋打扮，好煩同嘥時間。」

對於網民把她跟應屆澳門小姐麥嘉欣比較，雷莊𠒇直言沒留意：「人人都會有意見，我唔介意。」她表示對一些過份惡評感失望，令父母擔心她人身安全，並指沒有為惡評哭。同場的上屆港姐馮盈盈，去年當選都曾有負評，所以她覺得港姐不易做。

此外，04年港姐冠軍徐子珊昨晚到灣仔出席活動，當年她都曾被質疑變臉，對於雷莊𠒇被彈「至醜港姐」，子珊即閂後門兼扯開話題：「冇時間留意，因為9月1號重新做學生修讀心理學碩士。」問到她當年是否很大壓力？她說：「就係自己面對呢啲新聞唔叻，所以先讀心理學，當年自己要由零開始學起面對新聞，試過喊同成個人腫晒。」