「加州」系馬將會喺星期三（8日）谷草夜賽大晒冷，派遣旗下三駒上陣，而「加州神箭」就做先頭部隊，出戰今日（5日）第三場三班1000米直路賽，呢匹麥菲文馬房4歲馬，原定上月14日在港初出，但因腳傷退出，今仗賽前雖考閘合格，證明健康無礙，但該課閘走勢真係嚇壞人。

「加州神箭」上月24號試泥地1050米大閘，走勢就睇到人O晒咀，轉彎需要力騎，隻馬唔只冇反應，直路仲越跑越退，最終大敗14個馬位，同上月3日大勝草地800米閘差天同地。

原來祈普敦上月24號試完課泥閘後，即時同麥菲文say sorry，皆因「加州神箭」走內疊居中，出閘冇幾耐就被對手所踢起嘅泥頭擊中，感到痛楚自然唔多想跑，幸好只係試閘非正式出賽。

祈普敦強調毋須看重該課泥閘，亦相信「加州神箭」草地威力遠勝泥地，此駒來港前喺澳洲兩戰全勝，路程分別係1200同1300米，敦敦謂今仗只要交出上月3日草閘嘅表現，必屬爭勝要角。