2004快將進入倒數，過去三百多天，大家各自精采過日辰，肯定有特定應景的反思領會與心得，其中可有包括下列這些：
一、嘢可以亂食，說話可以亂講，但手不可以亂握。尤其是主席的手，一握就天下大亂。如果主席手痕，你千萬別扮「不求人」，叫他老人家玩吓隻手遮天好了。
二、隻手遮天，那隻手不是幕後黑手，已經曝光，但那個天，是不是指西九那個天幕？一隻手遮晒，去邊度搵咁大隻手，除非係特首！搞西九，做特首，果然冇點你。
三、股票經紀發達發遲些少，都要遊行抗議。香港盡快「共產」都唔錯，到時全港市民組成「共產黨」，合情合法瓜分大小財主的身家，嫌少的話，發爛渣上街示威就得。

四、鄧小平教人摸住石頭過河，高級公僕最聽教，博住大霧過冷河，當正公務員阿頭王sir是福頭。過河就係神仙，過檔大財團後，食住長糧兼有新人工，睇錢份上，做河粉或者粉腸都肯制。（事實證明大部份心甘命抵做粉腸！）
五、終審法院阻人發達，人大班大帝，今次點解唔釋法？難道，他們是領匯官非的幕後總指揮？阿婆撐得咁硬，原來係無間道裏頭的劉德華？
六、阿伯，咬住枝飲管排隊，近來唔興啦，擔住枝牙籤至夠潮。噢，假如你是姓董那位失寵阿伯，擔屎唔偷食都假。
七、年尾流流最埋身的啟示是，平時人緣麻麻的人，勿貪便宜去地震高危區度假，否則，人心肉做，好多人甚至你屋企的菲傭會因此開香檳慶祝！靚酒斷市都似！