日本天后濱崎步同第二任老外丈夫Tyson近年多次傳出婚變消息，今日步姐透個官方收費歌迷網站率先宣佈壞消息，表示已決定跟結婚3年嘅另一半各行各路，雖然內文冇提「離婚」兩個字，但就指對方有自己嘅路要行，而步姐自己都要獨自行佢嘅路，承認婚姻已經玩完。

步姐今次選擇親自向歌迷宣佈結束第二段婚姻，原因係唔想被傳媒率先報道，希望想跟Fans親自交代，目前步姐正為巡迴個唱開始綵排，而且又忙於為新歌錄音，其實佢日前已在社交網放風表示唔開心，又於a-nation上表演時疑似感觸落淚，今日終證實佢同丈夫Tyson都係逃唔過離婚宿命，唔少粉絲都戥偶像擔心，更於網上留言撐偶像，話會一直支持步姐。