當年今日

星級推介:胡定欣由淡至濃 Last先食牛肉 火鍋!

蘋果日報 2006/09/04 00:00


香港人乜都要快,食飯都唔例外,尤其係食日本菜,硬係要一碟二碟大碟細碟又豉油又Wasabi,一次過晒冷放晒上枱先過癮,激撐日本菜嘅胡定欣(Nancy)話:「食日本菜千祈咪心急,應該分門別類分先後次序慢慢食,咁先得出真滋味。」講到懶有理論咁,姑且又聽吓佢點講?
記者:蘇振鵬
攝影:何家亮
食啱次序
1.雜錦酢沙律$45
Nancy:「記得食沙律先呀!用秘製酸酢,開胃唔怕肥。」確實足料,有蟹柳、蟹子、北寄貝、海藻,入口唔齋。
empty
2.三文魚腩刺身$38
Nancy:「開胃咯喎,係時候食件三文魚腩刺身。」計我話計落仲好抵食,每碟6件唔使$40,每日限量供應,想食要快。
empty
3.雜錦刺身壽司拼盤$228
Nancy:「帶子王、三文魚各4件、牡丹蝦2隻、海膽壽司、三文魚子壽司、加州卷各2件、牛油果炸蝦卷4件,份量好足,我最鍾意食加州卷。」
empty
4.燒茄子$26
Nancy:「小食係時候登場,我推介燒茄子,鍾意鋪面嘅大量木魚絲,除咗令賣相靚啲,木魚絲同茄子味道都好夾。」
empty
5.海老天婦羅$58
Nancy:「炸物我推介天婦羅,因為我鍾意食蝦。」攝影哥哥偷食一件,睩大對眼話:「咦?影完相擺咁耐都仲咁脆?」無吹水,我都試咗件,粉漿比一般天婦羅脆,蝦肉好爽口。
empty
6.清酒煮大蝦$88
Nancy:「開始食濃味嘢嘞,大蝦用清酒醃過,吸夠酒味再用清酒嚟燒,勁在酒味唔會太勁,好惹味。」大頭蝦蝦膏豐富,肉質彈牙,無得頂。
empty
7.牛肉火鍋$50
Nancy重點推介:「個湯好甜呀,材料好足,又有我最Like嘅黃芽白,每次幫襯都必叫。」無介紹錯,湯底味道好濃,因為廚師加咗鰻魚汁、海鮮汁嚟調校,牛肉都好新鮮。
empty
由淡味食到濃味
港人Like日本菜,貪佢款式多多一碟二碟食得過癮,其實食唔同類別嘅日本菜,都應該有先後次序,Nancy話:「簡單啲講,應該先食味道淡同凍嘅菜式,例如沙律咁喇,先食可以開開胃,之後食刺身,然後到壽司、小食、炸物,Last食火鍋,咁就最能夠食出日本菜真正味道。」聽落有道理,話晒凍嘢多數開胃,先食淡味菜式,味道就唔會俾之後嘅濃味菜式掩蓋喇。「食刺身都有先後次序㗎,先食貝類,再到魚類;食魚類刺身呢,就要由淺色食到深色,因為深色嘅魚味道一定濃啲,即係先食吞拿魚、油甘魚,Last至食三文魚。」
empty
■老闆阿群,有多年主理日本菜經驗。
放題一樣有質素
Nancy激撐「千賀」,同老闆娘施小姐Friend過打Band嗰隻,「讀中學嗰陣已經同屋企人嚟幫襯㗎喇,幫襯咗7至8年,睇住佢由細舖搬到大舖,就算搬咗屋,我都會特登揸車入上環捧場。」點解咁撐場?「香港嘅日本菜,要平可以好平,要貴可以好貴,但價錢抵質素好嘅無幾多間。」老闆阿群師傅有多年整日本菜經驗,話晒係自己舖頭,食物質素就更加睇得緊,佢話:「我呢度不論自助放題抑或散叫,都係畀同檔次食物,絕唔會畀次貨大家。」呢啲咪叫誠意囉。
食客有Say
empty
Mandy「我鍾意炸蝦,好脆身,炸粉好薄,好味。」
empty
Derek「三文魚腩刺身,認真大件夾抵食。」
empty
阿偉「呢度都幾唔錯吖,價錢唔算貴,味道OK。」
搵食攻略
千賀日式餐廳(28157739)
地址:上環皇后大道中2-12號聯發商業中心地下B舖
營業時間:11:30am-3:00am,6:00pm-10:30pm
交通:上環地鐵站A2出口(近上環市政大廈)
座位:80個
最好賣:日式放題、三文魚腩刺身、牛肉火鍋