中超一向都千奇百趣，啱啱嗰輪河南建業主場2:1擊敗山東魯能，拎到3個月以來第1場主場贏波就唔出奇，不過原來球隊喺呢場波之前兩日，特登請15個道士嚟主場開壇作法，祈求轉運，結果而家即刻搞掂，係咪咁靈呀？

上次建業主場贏波，已經係6月17號3:1贏延邊富德，而且呢場波竟然係球隊成季唯一一次主場贏波，難怪球隊搞到要護級，有見及此建業一於搞搞新意思，開壇作個法，大大支旗寫住「建業驍勇善戰，旗開出奇製勝」同埋「天意建業必勝」

天意都出埋，而且有球迷影到真係有道士裝束嘅人坐喺看台手郁郁咁，建業結果開波26分鐘已經由列卡度同埋胡靖航各入一球，魯能最後靠加斯安奴柏利追番粒，不過建業都順利拎到今季主場第2勝。雖然之後嗰位道士仁兄就喺微博話，自己真係球迷黎睇波，本身一季都現場睇多過20場咁話。

之前廣州富力嘅越秀山主場，都曾經因為翻新後啲座位由金色變咗藍色，然後球隊幾場不勝，所以球會即刻將座位變番金色，又即刻贏到波。

不過，中國傳奇前鋒郝海東就批評呢種玄學態度係對球員嘅侮辱：「呢啲係21世紀中國？我以為係咩朝代，如果作法有用，咁山東輸波後又要咁做？咁中超以後變晒道士、和尚就得啦！」