花旗股市前晚反彈，股民定番晒，始終美股企喺高位，但市場好多壞消息，股民嘅態度會審慎啲，昨晚會唔會繼續升就好難講，不過，美股嘅升浪應該仲未完。
溫家寶總理去日本嘅「融冰之旅」大獲好評，如果大家有睇佢喺日本國會演講嘅內容，應該會同意「好評」並唔係純粹係「禮貌式」回應，篇演講詞好有心思，由「平民總理」講出嚟好有feel，相信中日雙方未來會開展更誠懇嘅接觸，兩個毗鄰大國搞好關係，對雙方同成個亞洲都有好處。
港股升過上20432，但好快跌番落嚟，因為主要成份股裏面，淨係靠滙控（005）撐場，國企股雖然靠穩，但屬於恒指成份股嘅股份，就得隻國壽（2628）撐得吓場，所以恒指最後都要跌39點收市。港股下禮拜會點？周初要睇昨晚花旗股市嘅表現，日線圖嘅支持位好近，下跌空間唔會好大。短線炒賣，仲係國內保險股有睇頭，下禮拜可續炒上，其他國企股，就要有所選擇。

中交C輪3620：中交（1800）昨收9.76元，3月初跌穿50日線即刻彈番上去，跟住就整咗條唔係好斜嘅通道慢慢推番上10日線樓上，呢排好多風話要炒佢，但一直冇乜動靜，昨日突然破通道頂炒上，成交大增，應該係開車嘅時候，收市前出現「壓正股掃C輪」嘅現象，擺明係炒上前嘅最後震倉活動，下禮拜一破10元關嘅機會好大，跟住睇10.80元，下一個位係12元，可以諗吓中交C輪3620，昨收1.38元，槓桿率7.1倍（有效5.8倍），對沖值0.82，正股升上10.80元，3620應該喺2.27元樓上，正股升上12元，隻輪應該唔會低過3.40元，正股跌穿9.30元止蝕。