當年今日

沙龍網賽花絮

蘋果日報 2002/09/29 00:00


樂隊獻唱氣氛佳
維園網球場外嘅廣場,除咗有嘢食有嘢玩之外,噚日準決賽同今日決賽大會重安排咗樂隊現場獻唱,令球迷喺等開波時可以聽吓歌,而現場氣氛相當唔錯,呢個安排實在值得一讚。

打夜波門票暢銷
近兩年沙龍網賽準決賽同決賽都係打夜波,雖然對本地傳媒可能唔係咁方便,但對球員或者球迷嚟講,就係好事,起碼唔會咁熱;據聞準決賽同決賽嘅門票銷情唔錯,噚晚準決賽有近七成球迷,而今日決賽嘅門票更加係非常搶手,只係剩番五百張。

西班牙內訌有睇頭
首號種籽沙芬提早出局,好在二號種籽費里路同三號種籽慕耶都順利晉級,決賽由呢兩位西班牙球星對決,都算係夢幻決賽,而從呢兩位球手今季嘅表現睇,相信決賽有一番激鬥。