今日美國媒體《CNN》發表咗一篇署名文章，提出「大陸冇人係安全」，嗰編文引用咗范冰冰「被消失」3個幾月做例子。既然人都可以消失，何況係一套劇，幾時都話黨係大過法。

噚日有網民爆料，話湖南衛視應廣電總局要求，將原來黃金檔正在播出嘅都市言情電視劇《涼生，我們可不可以不憂傷》換落嚟，喺國慶期間改播黃曉明、殷桃主演嘅改革開放獻禮劇《你遲到的許多年》。之後就有網友放出疑係衛視內部工作溝通嘅微信聊天截圖，該微信顯示「會上一個新劇」，據知所指嘅新劇就係曉明嘅主旋律《你》劇。

對於網上傳聞，黃曉明工作室方面表示以官方嘅報導為準，佢哋回應係：「我們不方便說，這些東西我們肯定是不能先說出來。」而《涼生》劇劇組亦冇明確答覆，都只係話一切以官方消息為準喎。

介紹返兩套劇，曉明嗰套政治正確作品，係改編自嚴歌苓嘅小說《補玉山居》，故事講述改革開放浪潮下，轉業軍人黃曉明係商海沉浮、情場中輾轉，係成長路上尋找迷失嘅自我、回歸初心嘅故仔，單係「初心」呢兩個字，已經值萬金。而正在播放嘅《涼生》由本港藝人鍾漢良主演，故仔講述鍾漢良、馬天宇、孫怡三個人之間橫跨二十年嘅愛與守護、深情與陪伴嘅情愛故事，黨性不足自然要讓路。

精選娛聞，喺晒《娛果》 http://fb.com/appledailyent