【懷孕5個月】趙詠瑤感覺不到B仔郁動：嚇到喊咗出嚟！
蘋果日報 2020/09/09 13:51
趙詠瑤
（受訪者提供圖片）
28歲的趙詠瑤（Kimi）在6月底公佈懷孕3個月的喜訊，透露今胎是B仔，她當時笑言與老公一樣，都想生女，因為可以幫女兒扮靚，不過現在先生B仔，奶奶就會開心一點。現時Kimi陀B仔已5個多月，近日發生了一件驚險事，嚇到Kimi忍不住哭了出來。昨日她在IG留言，指有一日感覺不到B仔的郁動，「寶寶，雖然你令到我越來越肥，但我都覺得好幸福，因為我好記得係17周仲未係好見肚嘅時候，就開始feel到你踢我，但有一日，唔知係咪我太忙，我完全feel唔到你郁，到晚上訓（瞓）係（喺）床好認真去feel都feel唔到...我嚇到喊咗出嚟...好彩你可能知我喊，又或者係啱啱訓（瞓）醒，突然feel到返你踢我，個下真係感動到唔識形容，雖然你成日踢我我話係好煩，但其實您每次踢我我都覺得好幸福ｏ架！」
Kimi今日接受《蘋果》訪問，她表示：「當日太忙嘅關係，成日都唔太feel到，最後我攤咗喺度，我feel唔到佢郁，已經諗住第二日要去睇醫生，但當時我同BB講，郁一下都好呀，嗰刻我驚到喊，終於知道自己母愛泛濫，好彩隔咗一陣，佢真係郁，我仲數住佢郁咗幾多下。佢真係好活躍，好早期已經有郁，好百厭。」問到有沒有孕婦不適的情況﹖Kimi說：「有幾日坐骨神經痛，但後來冇事，而胃口就冇變過。」她透露預產期是明年1月，會選擇順產。
雖然Kimi現時陀B仔5個多月，但看她這個星期拍的泳衣照片，似乎仍未見肚，她表示肥了10磅。至於她不時貼出泳衣相，Kimi稱想多記錄孕期時的身形，好讓自己生完BB後再看，她還自爆當初未知懷孕時，做了一件驚險事：「當時我遲咗嚟period，嗰段時間朋友約我去行山，仲要行勁高難度嘅山，要攀山下海，然後第二日返到屋企，我成個人好似癱瘓咗咁，完全攰到郁唔到，我以為曬傷咗，再隔一日我先諗起自己仲未嚟M，之後走去驗孕，先至發現自己有咗，原來當時我係帶住BB去行山，後來我睇番自己啲行山相，真係都驚。」問她預計何時停工﹖Kimi表示：「其實冇預到自己特登去停工，可能12月左右打後啦，都要同客戶夾下。」
Kimi在IG留言指，因感覺不到B仔郁而嚇到喊。（IG圖片）
雖然懷孕5個多月，但仍未見肚。（IG圖片）
經常拍攝泳衣相，她稱想多記錄孕期時的身型。（受訪者提供圖片）
她透露預產期是明年1月。（受訪者提供圖片）
當初未知自己懷孕，她相約朋友行山。（受訪者提供圖片）
挑戰高難度的山，還做出危險動作。（受訪者提供圖片）
原來當時是帶住BB去行山。（受訪者提供圖片）
-----------------------------
《蘋果》英文版免費試睇：了解更多