NCAA Final Four現身！繼岡薩加大學同俄勒岡州立大學上周六率先過關，周日輪到北卡羅萊納大學同南卡羅萊納大學殺入美國大學籃球聯賽（NCAA）4強！其中「籃球之神」米高佐敦（Michael Jordan）母校北卡喺南區決賽同肯塔基鬥得激烈，雖然肯塔基有馬歷克蒙克（Malik Monk）喺完場前7.2秒射入3分追成73平手，但北卡靠美耶（Luke Maye）喺冇暫停下完場前0.3秒射入絕殺Jump Shot，最終險勝75:73，以20次繼續成為歷來躋身Final Four最多次數學校！

至於南卡就以東區7號種籽身份脫穎而出，憑出色防守加上科維爾（Sindarius Thornwell）攻入26分，以77:70擊敗佛羅里達州立大學，更成為NCAA式「灰姑娘童話」！皆因佢哋喺1939至2016年只係贏過4場NCAA賽事，但今屆喺過去10日已經平紀錄，難為玩Bracket嘅球迷們幾乎全滅呀陰公。4強matchup分別係北卡對俄勒岡，以及南卡對岡薩加。