劉心悠今日喺澳門出席酒店開幕活動，佢透露剛喺加拿大旅行返港，容光煥發，佢話此行同媽咪自駕遊，去嘅地方都遠，平均要開9個鐘車，但佢開得慢，所以會連續開十幾個鐘：「我會停低休息，夜晚開車都黑同危險，有動物走出嚟，直路又會眼瞓，都會中途休息。」

劇集《宮心計2深宮計》點播率逾10億，馬浚偉同胡定欣都已兌現承諾公開祼照，劉心悠話：「我連小朋友裸照都冇，咁點算？我可唔可以寫個『裸』字，然後拎住影相？」記者笑心悠冇誠意，建議公開私密照，心悠用唔鹹唔淡廣東話話：「公開『絲襪照』？你哋知我有幾開放啦，露背得唔得呀？」

唔少網民批評心悠口音勁，佢就樂於接受意見：「我覺得批評係好事，今次係我第一次拍（香港）劇，同講咁多廣東話，預咗好多評論，我都會去聽。不過，口音同咬字係兩回事，咬字我會努力去練，但口音，係要喺香港住好耐先會有好地道嘅香港口音，呢樣嘢就要浸耐啲先得。」

精選娛聞，喺晒《娛果》
http://fb.com/appledailyent