顧嘉煇原定出年二月農曆新年期間喺紅館開榮休演唱會嘅檔期,有意讓畀許冠傑(阿Sam)。噚日馮仁昭為呢件事,特登同阿Sam演唱會負責人丘亞葵攞料,丘亞葵話紅館方面已經批咗期畀阿Sam,暫定由年三十晚唱到大年初五,即係出年嘅二月八號至十三號,丘亞葵話:「我哋原本係希望年廿九做到年初四,但一切要視乎之前開騷嘅Beyond可唔可以早啲交個場畀我哋。」
祁文傑設計海報
阿Sam今次個演唱會名為《歌神新春嘉年華05》,到時阿Sam除咗以全新舞台設計同服裝跟fans見面之外,重會扮財神大派利是,而著名漫畫家祁文傑更會幫阿Sam設計海報。丘亞葵話:「上次祁文傑畫漫畫登咗個全版廣告送畀阿Sam,令阿Sam好感動,所以今次希望搵佢幫吓手。另外,亦會搵女子十二樂坊做嘉賓。」至於今次個唱會唔會再加場,丘亞葵就話重未清楚。
小S逢星期二唔沖涼
小S徐熙娣噚日喺台灣以代言人身份出席化妝品活動,酬勞高達三十幾萬港紙,小S着住件超低胸禮服出現,雙峯「呼之欲出」,重不時撩起條裙晒美腿,極為性感。小S又自爆一套另類美容秘方,就係一星期唔沖涼兩三日,佢話:「星期二一定不洗澡,因為我要錄影節目,工作時我不在乎身上香臭,但星期四必洗,因為星期五要到夜店,身上香香的才有女人味。」
盧巧音拒談情說愛
盧巧音(Candy)噚日去商台接受訪問,Candy話近排忙緊籌備新碟,又話今次唔會以K歌為主,會有啲關於死亡嘅音樂,問佢怕唔怕人哋聽咗佢啲歌因太投入而走去自殺?Candy話:「咁又唔會,我絕對唔鼓吹呢樣嘢,只係啲歌唔再講愛情,或者講吓人嘅進化。」
藍奕邦幫倪震打圓場
藍奕邦前晚喺銅鑼灣搞咗個迷你音樂會,佢之前有份演出舞台劇《大娛樂家》,同梁詠琪合作,倪震都有去捧場。但倪震就話套劇睇唔明,跟住就惹嚟好多網友抨擊,藍奕邦話:「藝術嘅嘢梗係有人明有人唔明,好睇個人,我覺得大家不妨當係一場娛樂。梁詠琪做得好好,有好多驚喜。」
杜琪峰歎冇新血救市
杜琪峯噚日接受新城財經台訪問,雖然佢部新片《黑社會》有應采兒嘅戲份,而應采兒又被警方起訴,但阿杜冇諗過要易角。
講到近期電影市道唔掂嘅問題,阿杜就話𠵱家無論係編同導都冇新血,喺咁嘅情況之下,又點會有火花出現喎!
車淑梅高人教路闖情關
車淑梅近日接受有線《60分鐘玄機透視》訪問,佢話年輕時試過因為失戀而以為人生就咁玩完,後來佢拜訪一位高人,高人話佢嘅真命天子應該姓「黃」,結果佢同港台高層張文新拍拖時,發現對方個真名叫「黃天佑」,就知道對方係自己真命天子。