我哋喺日常生活中都幫過其他人，如果一直掛喺嘴邊，經常提住對方要還，咁其實唔可以用個「幫」字，因為成件事已經充滿計算，要「還」的話就變咗係交易。

我有個喺韓國居住嘅朋友叫偲嫣，有次去旅行我想訂bnb，但睇唔明條款而請教佢，憑良心講，佢真係有幫我，呢樣好感激，不過問題係偲嫣之後成日覺得我欠咗佢，每隔一排就提住。

其實當我去到韓國之後，已經特登請偲嫣出去食餐好（我覺得好，可能佢覺得好cheap都唔定，呢啲好主觀），當係答謝兼且見一見朋友，點知成件事仲未完，有次大家冇WhatsApp一排，偲嫣竟然message我，斥責我有事鍾無艷，無事夏迎春，我開始覺得呢個朋友交唔過。

大家各自有自己嘅生活同埋忙碌，你點可能指責一個朋友唔WhatsApp你就等於當初請教你係一種利用？我年中都無償地幫好多朋友搵工，但從來唔覺得佢哋欠咗我或利用我，幫到一定幫，計住計住會好辛苦，如果你要人還，咁就唔可以用個「幫」字，呢種係生意，係買賣。

後來我有個香港朋友同我一齊去韓國，我順勢約出嚟三個人食飯互相介紹，佢兩個之後熟咗，偶爾會WhatsApp溝通，但某次我香港個朋友好忙，兩日冇同偲嫣WhatsApp，然後就收到偲嫣訊息：「你真係打完齋唔要和尚。」

我香港個朋友好驚訝：「吓，點解佢會咁諗嘅？餐飯仲要你畀錢㗎喎。」

我答︰「係呀，因為佢覺得你同佢食飯係用緊佢時間，仲問咗啲旅遊資訊，即係利用緊佢，要還㗎。」

得人恩果千年記係美德，但小恩小惠提足你一世就係要不得，我哋喺生活同埋職場都成日遇到呢類人，如果你中過招唔緊要，當睇清楚，太計較嘅人要敬而遠之。

專欄作者簡介：
辦公室日報　聶瞳
記者出身，後脫離傳媒行業，誤打誤撞加入獵頭公司，幫人搵工，間接令一個家庭得到溫飽，因而成為我的第二人生。

Facebook專頁：
https://www.facebook.com/officedaily


發掘更多身邊的小城故事，請LIKE 蘋地 Facebook Page，並設定為「搶先看」： https://fb.com/appledailyland