賭王何鴻燊四太梁安琪今日54歲生日，噚晚與仔女猷亨及超盈，出席灣仔君悅酒店舉行嘅「保良局周年慈善餐舞會」，嚟緊四太將卸任保良局主席，佢話噚晚算係自己喺保良局最後一個大型晚宴，剩低就係四月八號就職典禮，屆時就應該可以抖一抖，不過佢手頭上仲有其他大Project要做，好似青年宿舍咁，四太話：「多謝四叔（李兆基）支持，拿拿聲起好，希望年輕人以低廉價錢有個地方住，有落腳點，等佢哋可以儲錢買樓。」

問到噚晚會否上台唱歌？佢話：「每年都想趁呢個晚會開心玩番晚，如果高興，都會上台玩下，不過要等我哋嘉賓表演晒先啦，今晚好多小朋友表演。（唱乜嘢歌？）未知呀，0依家聲都沙晒。（帶猷亨學嘢？）係呀，大家睇到呢，啲仔女都好支持我。」

至於四太另一囝囝猷君噚晚係神秘現身，佢話：「媽咪唔知我嚟嘅，因為美國未放春節假，所以提早兩日放。」

問到有乜生日驚喜送畀媽咪？猷君就話：「我囉﹗不過家姐﹑我同哥哥都喺度，禮物嗰啲好多嘢用錢買唔到，都要花下心思啦。（四太話你哋夾份送手袋畀佢？）呢啲都要嘅，物質上少少啦，驚喜就係爸爸上次生日，寫咗首歌畀佢，媽咪呢就會整啲藝術感嘅嘢畀佢。」