羅鈞滿呢位奇人，一向都做好多奇事，而做出嚟嘅，多數都會畀網民插爆或者嘲笑，記得喺13年6月，黃紫盈報道新聞嗰時流淚，後來傳出同張文采爭權，受委屈而流淚。羅鈞滿就以張文采男友身份，突然插嘴，喺微博力撐女友。不過當時就俾網民話佢借女友博位，仲自稱三線藝人，此話一出，網民就話佢「7線當3線。」

今日羅鈞滿又出招喇，佢喺微博貼咗一盒麥樂雞嘅相，仲話：「明知山有虎。」網民見到佢咁，當然又話佢抽水啦，仲有網民話要祝佢好運，又話：「然後你還去送死。哎。」

除咗羅鈞滿之外，梁思浩都有講到麥當勞嘅事件，佢貼咗一份蘋果日報嘅頭版話：「我都是一個賣食品的商人，賣食物要用良心！食物安全最重要！我寧願賺少一些，也要給客人最好的品質！為何越大的商家越冇良心！難怪我永遠只能夠做一個『有良心的小商家』。」

大家都知，麥當勞由福喜不同廠房提供麥樂雞及多款蔬菜，依家福喜食材被暫停入口，麥當勞多款食品須暫停供應，包括麥樂雞、脆辣雞腿飽、粒粒粟米杯、凍新鮮檸檬茶、田園沙律及雞扒沙律等等。羅生貼張教麥樂雞相再加句「明知山有虎」——喂喂喂，黃子華喺劇集咪講過囉，明知山有虎，偏要去露營……

其實羅生嘅「往史」，真係罄竹難書，最經典係13年10月，香港電視不獲香港政府發出免費電視牌照，王維基出嚟話不公義，而羅鈞滿就喺facebook留言話：「作為電視業一員，當然希望電視業百花齊放。但是請王先生勿將自己商業失敗跟社會公義拉上關係。」仲話「王維基先生絕對不負責任和應負全責。」當然又係俾網民大插，又話佢抽水博上位。

仲有之前Liddy(李悅彤)同彭順出事，作為Liddy舊愛嘅羅鈞滿又有出聲撐舊愛，仲叫大家畀多啲空間同時間Liddy。成功見報。

今次都成功咗喇。