周潤發在娛樂圈超過30年，工作態度一直有口皆碑，但最近他因為沒到內地宣傳主演的電影《滿城盡帶黃金甲》，惹來張藝謀的拍檔兼投資該片的老闆張偉平連番指摘，這股寃屈氣，發哥是不吐不快：「我做呢行咁耐，點會唔肯做宣傳，之前我都幫呢套戲去過美國、新加坡、台灣同香港宣傳，冇去內地做係因為有份投資呢部戲嘅香港安樂公司老闆江志強叫我唔使去內地呢站，當時我聽到呢個安排係幾意外，因為內地係一個咁重要嘅市場，但我做演員嘅，老闆呢個要求我只好遵從，後來張偉平走出嚟鬧，我真係唔知佢同江老闆之間發生乜嘢事。」

對於張偉平指摘發哥拍該片要求荷李活待遇令他吃不消，發哥回應說：「每個演員喺市場上有本身嘅身價，我去荷李活拍戲同喺亞洲地區拍戲都係用同一份合約，合作係你情我願，有問題係咪應該喺簽約前講清楚，呢啲係合約精神，點解要拍完部戲先走出嚟鬧，而且部戲咁收得又唔係蝕錢，仲走出嚟鬧乜鬼，我真係第一次見製作人咁樣走出嚟指摘演員，佩服！佩服！以後要跟張生多多學習。」
對現已名利雙收的發哥來說，演戲為興趣多於為賺錢，如果有好劇本，片酬多少反而不是考慮因素，他說：「我拍許鞍華嘅《姨媽的後現代生活》，因為鍾意個劇本，又明知部戲係小本製作，所以我收咗好少片酬就接咗呢部戲，問題係劇本可唔可以吸引到我。做咗演員咁多年，我認為每個角色都有唔同嘅挑戰，特別係打好晒燈，擺位嗰一刻完全係我嘅世界，滿足感好大，所以我對演戲唔會厭倦，而且開工時有一大班人一齊，傾吓講吓，真係好開心。至於我另一個興趣，當然係攝影，不過攝影係較個人化，你揸住部相機周圍獵影，好多時要睇天做人，要影張靚相，好多時都唔由得我控制。」