(新增回應)

8號風球，有市民都會最愛去一個地方，嗰度…叫做堅尼地城。

你懂的。就係去海傍睇浪，測試下個風嘅威力。
咁做當然係超錯。
生命寶貴，千祈咪制。

今晚黃德斌同女友Joyce，仲有一班朋友，喺天文台高掛8號西北烈風或暴風信號嘅晚上，約9點鬆啲，去咗西環堅尼地城海傍。

據知黃德斌與女友及友人係喺堅尼地城一帶食完飯，嗰頭酒吧林立，唔知係咪想搵下場啦，一行人沿住酒吧街行，邊行邊吹水，未有行出海傍……住。

苗柏已經升呢做強烈熱帶風暴，中心附近最高持續風速每小時90公里，海傍一帶風力極猛，所以即使黃德斌& friends匿晒去騎樓底，依然感受到嗰種威力。

之後等風雨稍停，成班人就去咗海傍打卡……3男4女，包埋黃德斌同女友，佢兩個仲好sweet咁攬住影，打風都打唔甩咁。

之後德斌就拖住身穿雨衣同短褲仔嘅女友，二人世界拖手仔返歸。其後佢接受傳媒訪問時，以短訊回覆謂:「同朋友喺嗰度食完飯。」擔唔擔心危險？德斌話：「其實都係食完飯經過感受下強風，一陣就離開咗。」

下次打風飯後散步，記住唔好去睇浪喇。